Ümummilli Lider Heydər Əliyevin Anım günü münasibətilə Dini Qurumlarla İş üzrə Dövlət Komitəsinin təşkilatçılığı ilə keçirilən “Yaşıl gələcək naminə” ekoloji aksiyası dekabrın 8-də Tovuz, Ağstafa, Qazax, Şəmkir, Gədəbəy, Şəki, Qəbələ, Oğuz, Ağsu, İsmayıllı, Şamaxı və Qobustan rayonlarında davam etdirilib.
Din xadimləri, dini icma üzvləri və ictimaiyyət nümayəndələrinin iştirak etdikləri aksiya çərçivəsində dini ibadət yerlərinin ətrafında abadlıq işləri aparılıb, ağac tingləri və gül kolları əkilib.
Tovuz, Ağstafa, Qazax, Şəmkir və Gədəbəy rayonlarında 10 məsciddə təmizlik və abadlıq işləri görülüb, 3 ibadət evində ağac tingləri əkilib. Şəki, Qəbələ və Oğuz rayonlarında 61 məsciddə təmizlik və abadlıq işləri aparılıb, 8 ibadət evinin həyətyanı sahəsi yaşıllıqlarla zənginləşdirilib. Ağsu, İsmayıllı, Şamaxı və Qobustan rayonlarında isə 32 ibadət evində təmizlik və abadlıq işləri görülüb, 8 məsciddə ağac tingləri və gül kolları əkilib.
Aksiyanın əsas məqsədi dini icmalar arasında ekoloji maarifləndirməni gücləndirmək və ölkədə aparılan genişmiqyaslı yaşıllaşdırma prosesinə dəstək verməkdir.
