Ümummilli Lider Heydər Əliyevin Anım günü münasibətilə Dini Qurumlarla İş üzrə Dövlət Komitəsinin təşkilatçılığı ilə keçirilən “Yaşıl gələcək naminə” ekoloji aksiyası Şuşa, Ağdam, Füzuli, Cəbrayıl, Zəngilan, Tərtər, Ağcabədi, Masallı, Cəlilabad və Yardımlı rayonlarında davam etdirilib.
Din xadimləri, dini icma üzvləri və ictimaiyyət nümayəndələrinin iştirak etdikləri aksiya zamanı dini ibadət yerlərinin ətrafında abadlıq və yaşıllaşdırma işləri aparılıb, ağac, gül kolları əkilib.
Masallı, Cəlilabad və Yardımlı rayonlarında 50 məsciddə təmizlik və abadlıq işləri görülüb, 25 ibadət evinin həyətyanı sahəsi yaşıllıqlarla zənginləşdirilib. Tərtər, Ağcabədi, Ağdam, Füzuli, Cəbrayıl və Şuşa rayonlarında isə 10 ibadət evində təmizlik və abadlıq işləri aparılıb, ağac tingləri əkilib.
Azərbaycanın bütün bölgələrini əhatə etməklə dekabrın 10-dək keçiriləcək aksiyanın məqsədi müxtəlif konfessiyalar arasında həmrəyliyin, ictimai birlik ruhunun daha da gücləndirilməsinə töhfə vermək, dini icma üzvlərinin və ictimaiyyətin diqqətini ətraf mühitin sağlamlaşdırılmasına, yaşıllıqların artırılmasına yönəltməkdir.
