Türkiyənin İstanbul şəhərində “Keçmişdən Bu günə Qüds” adlı foto-şəkil sərgisi açılıb. Kommunikasiya İdarəsi tərəfindən “360 mədəniyyət-incəsənət” layihəsi çərçivəsində təşkil edilən sərgidə Qüdsün tarixi və müasir fotolarına yer verilib.
Üç ilahi dinin müqəddəs şəhəri hesab olunan Qüdsün fotoları, qalareyanın divarlarında video-mapping texnologiyası ilə əks olunur.
Həmçinin Qüds barədə həqiqətlər arxivlərdən də istifadə olunaraq 3 ölçülü holoqram filmlə nümayiş edilir.
Sərgini ziyarət edənlər burada, Qüdsdə yaşanan zülmü daha yaxından hiss edəcəklər.
İstanbul “Marmaray” metrosunun “Yenikapı” stansiyasının foyesində baş tutan sərgi ödəməsiz olaraq iyulun 12-nə qədər həftənin 6 günü səhər saat 11.00-dən axşam 19.00-a kimi açıq olacaq.
