Səudiyyə Ərəbistanı Məkkə şəhərindəki Məscidi-Haramda əlində bıçaq olan və terror qruplaşmalarının lehində şüarlar səsləndirən şəxs saxlanılıb.
Bu barədə yerli SPA agentliyi şəxsiyyəti məxfi saxlanılan polisə istinadən məlumat yayıb.
Məlumatda bildirilir ki, əsr namazından sonra Hərəmi-Şərif ərazisində əlində kəsici alət olan və terror qruplaşmalarına dəstək verən şüarlar səsləndirən bir nəfər saxlanılıb. Saxlanılan şəxs barədə qanunvericiliyə uyğun təhqiqat başladığı qeyd edilib.
Səudiyyə Ərəbistanında fəaliyyət göstərən bəzi xəbər saytları hadisə barədə qeyri-peşəkarlıqla çəkilmiş videogörüntü paylaşıb. Görüntülərdə, ənənəvi səud geyimində olan şəxsin təkbir gətirərək İŞİD terror qruplaşması lehində şüarlar səsləndirdiyi görülür.
