Ümumdünya Müsəlman Alimlər Şurası Qüdsə və Məscidi-Əqsaya yardım etmək üçün müsəlman ölkələrə çağırış edib. Şura bu istiqamətdə yaydığı bəyanatda Qüdsə və Məscidi-Əqsaya göstəriləcək maddi yardımların toplanacağı bir fond təsis etməyi təklif edib.
Bəyanatda, Qüdsü və Məscidi-Əqsanı müdafiə etməyin müsəlmanlar üçün etiqadi öhdəlik, bu istiqamətdə göstərilən səhlənkarlığın ümmətə qarşı işlənmiş bir cinayət olduğu vurğulanıb.
İsrailə qarşı nümayiş etdirdiyi müqavimət, səbr və səbata görə Qüds, Qəzza və Fələstin xalqını təbrik edən şura, İsrailin hücumları nəticəsində dünyasını dəyişən müsəlmanlara Allahdan rəhmət diləyib.
Ümumdünya Müsəlman Alimlər Şurası müsəlman cəmiyyətlərə müraciət edərək, onları aralarındakı fikir müxtəlifliklərini bir kənara qoyub ortaq dəyər ətrafında birləşməyə dəvət edib.
Bəyanaın sonunda müsəlman dünyasından və beynəlxalq ictimaiyyətdən öz öhdəliklərini yerinə yetirmələri, Fələstinin haqlı mübarizəsinə dəstək vermələri tələb olunub.
