Dekabrın 1-də Ümummilli Lider Heydər Əliyevin Anım günü münasibətilə Dini Qurumlarla İş üzrə Dövlət Komitəsi tərəfindən təşkil olunan “Yaşıl gələcək naminə” ekoloji aksiyasına start verilib. Layihə çərçivəsində Gəncə-Daşkəsən və Quba-Xaçmaz bölgələrində genişmiqyaslı yaşıllaşdırma tədbirləri görülüb.
Adıçəkilən bölgələrin dini konfessiya nümayəndələri, gənclər, könüllülər və ictimaiyyət fəalları bir araya gələrək ağacəkmə və abadlıq işlərində iştirak ediblər. Aksiya çərçivəsində yüzlərlə ağac tingi əkilib, yaşıllıq sahələrinin bərpası və genişləndirilməsi istiqamətində işlər görülüb. Aksiya Quba-Xaçmaz bölgəsi üzrə 45, Gəncə-Daşkəsən bölgəsi üzrə isə 10 ibadət evini əhatə edib.
Aksiyanın məqsədi dini icmalar arasında həmrəylik və qarşılıqlı əməkdaşlıq mühitini daha da gücləndirmək, ictimaiyyətin diqqətini ətraf mühitin mühafizəsinə yönəltmək və yaşıllıqların artırılması prosesinə töhfə verməkdir.
Dekabrın 10-dək davam edəcək “Yaşıl gələcək naminə” aksiyası çərçivəsində ölkənin digər bölgələrində də silsilə tədbirlərin keçirilməsi nəzərdə tutulur.
